Utangulizi:
Zimesalia siku 50 kabla Watanzania hawajapiga kura kumchagua Rais wa serikali ya Awamu ya Sita hapo Oktoba 28 mwaka huu. Kadhalika, leo ni wiki ya pili kamili tangu kuanza rasmi kwa kampeni za urais, ubunge na udiwani hapo Agosti 26.
Walengwa:
Walengwa wakuu katika tathmini hii ni kama ifuatavyo
👉John Magufuli na chama chake cha CCM
👉Tundu Lissu na chama chake cha Chadema
👉Bernard Membe na chama chake cha ACT-Wazalendo
👉Maalim Seif Sharif Hamad na ACT-Wazalendo huko Zanzibar
👉Dkt Hussein Mwinyi na chama chake cha CCM huko Zanzibar
Mwenendo wa Kampeni:
Magufuli:
Pamoja na kufanikiwa kuharamisha shughuli halali za kisiasa za vyama vya upinzani katika miaka yake yote mitano ya utawala wake, kampeni za Magufuli haziakisi taswira ya mgombea aliyepo madarakani.
Kwa upande mmoja, mwenendo wa kampeni za Magufuli umekuwa kama unaojikita zaidi kujibu mashambulizi ya mgonbea wa Chadema, Lissu, badala ya kujivunia rekodi yake katika miaka mitano inayomalizika mwaka huu.
Kwa upande mwingine, Magufuli ni kama ameishiwa na ahadi, ambapo hotuba zake zimekuwa kama marudio ya hotuba zake za kila siku ambapo “hadithi ni zile zile za bombadia, SGR, Stigla, Uchumi wa Kati,” nk.
Japo Magufuli na CCM yake wanaweza kujitetea kuwa “hadithi hizo” are in fact “rekodi yake na ya chama chake kwa miaka mitano,” lakini sio tu zinaweza “kuwakifu” wapigakura kwa sababu wamekuwa wakizisikia kwenye takriban kila hotuba ya Magufuli, bali pia zinaweza kujenga taswira kuwa “Magufuli na CCM yake hawana jipya.”
Kurudia “hadithi zilezile” kwaweza pia kumgharimu Magufuli na CCM yake kwa sababu unless anapuuzia ukweli kuwa hali za Watanzania wengi kimaisha ni mbaya, ni lazima aje na angalau “porojo mpya” za kuwapa moyo kuwa miaka mitano ijayo hali itakuwa nafuu japo kidogo.
Lakini uwezekano wa hilo kutokea ni mdogo kama sio haupo kabisa, kwa sababu moja kuu.Magufuli ni mwanasiasa jeuri asiyeonyeshwa kusumbuliwa na vilio vya mamilioni ya Watanzania kuhusu hali ngumu za maisha yao.
Mara kadhaa mwanasiasa huyo amekuwa akikebehi kuwa wanaolalamikia ugumu wa maisha ni “wapiga dili wanaolalamikia kuzibwa kwa mianya ya kupiga dili.” Haya ni matusi kwa mamilioni ya Watanzania huko vijijini ambao “dili” pekee kwao ni kilimo mashambani kabla hawajadhulumiwa na vyama vya ushirika au/na walanguzi.
m
Tundu Lissu:
Kinyume na matarajio ya wengi, kampeni za Lissu zinakwenda vizuri. Na si vizuri tu bali pia vizuri zaidi ya kampeni za Magufuli. Silaha kubwa ya Lissu imekuwa kutokuwa na jazba katika uwasilishaji wa hoja zake. Na katika hili anastahili pongezi kubwa kwa sababu ingeweza kuwa rahisi tu kwa yeye kuendeshwa na chuki na kiu ya kulipa kisasi kutokana na serikali ya Magufuli kusimamia jaribio la kutaka kumuua Lissu.
Na kana kwamba hila zote walizofanya dhidi ya Lissu hazitoshi, majuzi tu, Makamu wa Rais amesikika akifanya mzaha kuhusu jaribio hilo la kumuua Lissu.
SAMIA SULUHU: ASKARI WA SERIKALI YA CCM AKIPIGA RISASI 3 AKAKOSA ATAWAJIBIKA
Lakini pengine jambo kubwa zaidi kuhusu Lissu ni idadi ya wahudhuriaji kwenye mikutano yake. Kwanini idadi hiyo kubwa ni muhimu sana? Kwa sababu, wakati wahudhuriaji kwenye mikutano ya Magufuli wamekuwa wakisombwa kwa malori sambamba na wasanii mbalimbali wa bongofalva na wa filamu kutumika kujaza watu, maelfu kwa maelfu wanaohudhuria mikutano ya Lissu ni watu ambao hawakushawishiwa na kitu chochote au mtu yeyote.
Wakati pointi hiyo ya juu ikiwa na umuhimu mkubwa, pointi nyingine muhimu kabisa ni ukweli kwamba katika miaka mitano ya utwala wa Magufuli, vyama vya upinzani vilipigwa marufuku kufanya shughuli zake halali za siasa ikiwa ni pamoja na mikutano ya ndani ya nje na maandamano. Kwahiyo katika mazingira ya kaiwada ingetarajiwa kuwa ruksa ya mikutano ya kampeni za upinzani iambatane na hali ya uoga au mahudhurio hafifu. Lakini idadi ya wahudhuriaji imezidi kuongeka kutoka eneo hadi eneo.
Licha ya mahudhurio hayo makubwa, Lissu amefanikiwa sana kwenye ujenzi wa hoja. Na kipimo mwafaka cha mafanikio hayo kinaonekana kwenye ukweli kwamba hotuba za Magufuli sasa zimekuwa za kujibu hoja za Lissu.
Kwenye kampeni za uchaguzi wowote ule, mgombea anayemlazimisha mpinzani wake kuwa wa kujibu hoja zake basi ana nafasi ya mbele zaidi.
Bernard Membe:
Mwelekeo wa kampeni za mwanasiasa huyo ni wa kusuasua. Baada ya uzinduzi wa kampeni zake za urais zilizohudhuriwa na watu wachache tu huko Lindi, ule msisimko ulijitokeza alipojiunga na ACT-Wazalendo umefifia mno.
Kuna wanaodhani kuwa hata kauli yake kuwa aliamua kukusanya saini za wadhamini kimyakimya zilikuwa zinaficha ukweli kuwa huenda alihofia “kuumbuka” kwa kupata watu wachache tu kwenye mikutano yake.
Hata hivyo, yeye mwenyewe ametamka kuwa sio tu hatojiondoa kwenye kinyang'anyiro hicho bali pia atakuja na kimbunga kuanzia Septemba 15
HATOKI MTU HAPA! Wale wote wanaodhani kuwa Nitajiondoa katika kinyang'anyiro cha Urais wa Jamhuri ya Muungano wa Tanzania kupitia ACT Wazalendo, wanaota ndoto za Mchana. Kimbunga kitakachoanza tarehe 15 September 2020 October ni Kimbunga kumba-kumba! Watanzania kaeni chonjo!
Pengine kumpa kitu Waingereza wanaita “benefit of the doubt,” ni vema kusubiri hiyo tarehe aliyotaja kuona kama kuna mabadiliko yoyote katika mwenendo wa kampeni zake. Hata hivyo, katika mazingira ya kawaida, nadhani itakuwa vigumu sana kwa mwanasiasa huyo kupata wahudhuriaji wengi kwenye mikutano yake ya kampeni.
Na pengine hii ndio sababu iliyowafanya Chadema wakatae ushirikiano baina yao na ACT-Wazalendo kwa sababu huenda walihisi kuwa ushirikiano huo ungewanufaisha zaidi AC-Wazalendo kuliko wao Chadema.
Maalim Seif Sharif Hamad:
Maalim Seif ni mwanasiasa maarufu kuliko yeyote yule huko Zanzibar. Na hii inapaswa kuwa turufu muhimu kwake na kwa chama chake cha ACT-Wazalendo. Kwamba Maalim Seif anaweza kushinda uchaguzi huo sio suala la kujiuliza kwa sababua ana sapoti ya kutosha.
Na kimsingi, inaaminika kuwa takriban kila chaguzi tangu kuanza kwa mfumo wa vyama vingi, mwanasiasa huyo amekuwa akishinda chaguzi hizo kabla ya serikali ya CCM kwa kushirikiana na vyombo vya dola na Tume Ya Taifa ya Uchaguzi Zanzibar kubadili matokeo.
Ukweli mchungu ni kwamba hakuna dalili hata moja kuwa serikali ya CCM, ya Muungano na ya Zanzibar, zipo tayari kutenegenza mazingira ya uchaguzi mkuu ulio huru na wa haki.
Tayari wagombea ubunge wote wa chama hicho huko Pemba wameenguliwa na Tume hiyo. Lakini hadi wakati jarida hili linakwenda mitamboni haijafahamika hatua gani chama hicho kitachukua endapo Tume itang'ang'ania msimamo wake wa kutowarejesha wagombea hao kwenye nafasi wanazogombea.
Chaguzi za Zanzibar kila mara zimeshuhudia hujuma za waziwazi dhidi ya Maalim Seif na chama chake cha CUF. Na mwaka huu kumekuwa hakuna tofauti. Ndio maana basi pengine ni muhimu kuanza kutafakari kuwa nini kitatokea endapo Maalim Seif atahujumiwa au wagombea ubunge kadhaa au wote wakahujumiwa.
Jinsi Maalim Seif na ACT-Wazalendo kwa ujumla watakavyomudu kushughulikia suala hilo la wagombea wa Pemba litatoa picha ya jinsi chama hicho kilivyojipanga kupambana na dhuluma katika uchaguzi wa mwaka huu.
Dkt Hassan Mwinyi:
Huyu bwana ana kazi rahisi kabisa, kwani kama ilivyotanabaishwa hapo juu, kila uchaguzi mkuu, mgombea wa CCM - kama ilivyo sasa kwa Dkt Mwinyi - “hubebwa” na serikali ya CCM Zanzibar na Bara kwa ushirikiano na vyombo vya dola na Tume ya Uchaguzi Zamzibar (ZEF).
Kwahiyo, hata kutathmini kampeni zake ni kupoteza muda kwa sababu unless Maalim Seif na ACT-Wazalendo waamue “liwalo na liwe,” Dkt Mwinyi atakuwa mrithi wa Rais wa sasa, Dokta Mohammed Ali Shein.
Kwahiyo, cha kuangalia kwa mgombea huyo ni kinachojiri ACT-Wazalendo Zanzibar kuliko ndani ya CCM Visiwani.
Hitimisho:
Ni muhimu kutambua kuwa mapungufu ya Magufuli na kampeni zake hayamaanishi ushindi kwa Lissu kirahisi. Magufuli anaweza kuboronga lakini Idara ya Usalama wa Taifa ambayo mwaka huu imekabidhiwa jukumu la kuendesha uchaguzi huo wakamsaidia kushinda “kiulaini.” Ukichanganya na hujuma za waziwazi dhidi ya Lissu na Chadema, kunahitajika aina ya miujiza fulani kwa Magufuli kuanguka kwenye uchaguzi huo.
Hata hivyo, kuna mambo mawili hivi ya msingi. Moja ni ukweli kwamba uwepo wa Lissu huku ughaibuni kwa takriban miaka mitatu hivi kunaweza kuwa kumemjengea mahusiano mazuri na “mabeberu” ambao wakiamua, hakuwa na kuwazuia kumwezesha Lissu kuwa mrithi wa Magufuli.
Kwa bahati mbaya, sio rahisi kuwa na uthibitisho wa “makubaliano ya siri” kati ya Lissu na “mabeberu,” lakini kuna uwezekano huo.
Ifahamike kuwa neno “mabeberu” hapa limetumika kama kejeli tu kwa Magufuli na CCM yake ambao wakiwa na shida ya pesa, “mabeberu” hugeuika nchi au taasisi wahisani, lakini pindi wahisani hao wakipiga kelele dhidi ya ukandamizwaji wa demokrasia na haki za binadamu, wanaitwa “mabeberu.”
Kingine ni kile Wamarekani hukiita “October surprise.” Yaani tukio linaloweza kujiri dakika za mwisho mwisho kabla ya siku ya kupiga kura na ambalo linaweza kubadili kila kitu hususan matokeo ya uchaguzi huo. Moja ya “October surprises” ni afya ya Magufuli. Kwamba inaweza kudhoofika kiasi cha kumfanya ashindwe kuendelea na kampeni za uchaguzi. Kwanini ahisiwe hivyo? Kwa sababu afya yake ni mgogoro.
Mwisho
TANGAZO:
Wiki hii hakutokuwa na mwendelezo wa kozi ya Udukuzi wa Kimaadili kutokana na sababu zilizo nje ya uwezo wangu. Kozi itaendelea mwishoni mwa wiki. Samahani kwa usumbufu.
Don’t miss out on the other issues by Evarist Chahali
Become a member for $5 per month
You can manage your subscription here.
If you don't want these updates anymore, please unsubscribe here.
If you were forwarded this newsletter and you like it, you can subscribe here.
Created with Revue by Twitter.



